БӘЙДІБЕК: МЫҢБҰЛАҚ АУЫЛДЫҚ ОКРУГІНДЕ ЕСЕП БЕРУ КЕЗДЕСУІ ӨТТІ

Аудан әкімі Ерлан Нұрмахановтың есепті кездесуі Мыңбұлақ ауылдық округінде өтті.

Мыңбұлақ ауылдық мәдениет үйінде ауылдық округтің тұрғындарына есеп берді. Есепті кездесуде аудан әкімі Ерлан Нұрмаханов ағымдағы жылы атқарылған, жүргізіліп жатқан және алдағы атқарылатын жұмыстарға кеңірек тоқталып өтті.

Кездесуде ауылдық округке қарасты елді мекеннің тұрғындары аудан әкіміне өздерінің ұсыныстары мен пікірлерін жеткізді.

Тұрғындар тарапынан жайылым жер мәселесі, Бестоғай елді мекенінде ескі электр бағаналарын, желілерін ауыстыру, көше жарығын көтеру, ағын су арығына лоток қою мәселесі көтерілді. Мәдениет елді мекенінде көпірді бетондау, көшені жарықтандыру, Қосбұлақ елді мекенінің ішкі көшелеріне асфальт төсеу және басқа да әлеуметтік мәселелер бойынша сұрақтар қойылды. Сұрақтарға сала бойынша аудан әкімінің орынбасары мен бөлім, мекеме басшылары мен ауыл әкімі тарапынан жауаптар берілді.

— Бекітілген кестеге сәйкес, бүгін арнайы өздеріңізбен кездесіп отырмын. Сіздердің ұсыныстарыңыз бен өтініштеріңіз бақылауға алынады. Хаттамаға енгізіліп, зерделеуді қажет ететін бірқатар мәселелерді анықтап, орындау жөнінде жауапты басшыларға тапсырма бердім. Көтерілген мәселелерді шешуге күш салып, әрбір өтініш бойынша тиісті жұмыстар жүргізілетін болады, – деді Ерлан Нұрмаханов.

Кездесу жиынынан кейін аудан әкімі жеке қабылдауға жазылған азаматтарды қабылдады.

Жиынға аудан әкімінің орынбасары, аудандық мәслихат депутаты, дербес бөлімдер мен мекеме басшылары, ауыл тұрғындары қатысты.

Бәйдібек ауданы әкімінің баспасөз қызметі