ШЫМКЕНТТЕ ДАУЫЛ САЛДАРЫНАН БҮЛІНГЕН ЖЕРЛЕР ҚАЛПЫНА КЕЛТІРІЛУДЕ

Шымкент қаласында өткен тәулікте оңтүстік-батыстан, батыстан соққан желдің нақты жылдамдығы секундына 26 метр болды.

Желдің салдарынан қала бойынша 3 коммерциялық объектінің, 5 көпқабатты тұрғын үйдің, 2 білім беру объектінің шатырлары ұшып, автокөліктердің, ғимараттардың үстіне құлаған. Жалпы ғимараттардың 3223 шаршы метр шатыры құлаған, 6 автокөлік зақымдалған. Қазір келтірілген шығын көлемі анықталуда. 2009 жылы туған бала зардап шеккен. 12 жасар баланың қазіргі таңда денсаулығы орташа. Ол «Нұрсәт» шағынауданындағы облыстық балалар ауруханасында ем қабылдауда.

Қаратау ауданы «Нұрсәт» шағынауданында, Қызыл су, Исфиджаб, Өтеміс, Сайрам, Шапырашты тұрғын алаптарында электр қуаты сөнген. Авариялық-қалпына келтіру жұмыстарын Қайнарбұлақ, Сайрам аудандық электрстансалардың мамандары атқарып, сағат 22:18-де аталған мекенжайларға электрқуаты қайта қосылды.

Барлық оқиға орындарында Шымкент қ.ТЖ департаментінің жеке құрамында 24 адам, 7 техника, «КазТрансГаз» АҚ Шымкент филиалының 3 қызметкері, 1 техникасы, «Оңтүстік Жарық транзит» ЖШС-ның 3 қызметкері, 1 техникасы, «Су ресурстар маркетинг» ЖШС-ның 70 қызметкері,10 техникасы жұмыс атқарған.

Орын алған жағдай бойынша Шымкент қаласы ТЖ департаментінде жедел штаб құрылып, тәулік бойы кезекшілік ұйымдастырылды. Департаменттің жеке құрамы дайындыққа келтіріліп күшейтілген жұмыс режиміне ауыстырылды.

Қазіргі уақытта коммуналдық қызметтер мен апаттық бригадалар дауыл салдарын жоюмен айналысуда.