ЖАСТАРҒА — ЖАЛДАМАЛЫ ПӘТЕР

Елбасы Нұрсұлтан Әбішұлы жастардың алдында сөйлеген сөзінде «Жас отбасыларға арналған баспана мәселесі ірі қалаларда өткір екенін ескере отырып, үкіметке алдымен Астанада, Алматы мен Шымкентте жұмыс істейтін жастар үшін жылына 1 мың пәтерден кем емес құрылысты қамтамасыз ету қажет. Бұл пәтерлер жалдамалы баспана санатына жатқызылуға тиіс» деген еді.

Жастарды жалдамалы пәтермен қамту Мемлекет басшысы Қ.К.Тоқаевтың халыққа Жолдауында да баса айтылды. Тапсырманы орындау мақсатында мемлекет бюджетінен 21 млрд теңге бөлінді.

Мәжілістегі Үкімет сағатында ҚР Ақпарат және қоғамдық даму министрі Дәурен Абаев 2022 жылдан еліміздің басқа да өңірлерінің жұмысшы жастарына жалдамалы пәтер салынуы мүмкін екенін айтты.

“2019 жылы 3 000 пәтер Нұр-Сұлтан, Алматы және Шымкент қалаларында жұмыс істейтін жастарға 5 жыл мерзімге жалға берілетін болады. Болжанған жалдау ақысы 15 мың теңгеден аспайды. Ал, тұрғын үй алаңы кемінде 40 шаршы метр. Нұр-Сұлтан қаласында пәтерлерге құжаттар қабылдау бүгін басталды. Алматы қаласы бойынша 200-ден аса өтінім түскен. Алдағы 3 жыл ішінде осындай 9 мың пәтер беріледі” деді Д.Абаев.

Осы ретте Дәурен Абаев бұл жүзеге асырылып жатқан шараларға қарап, жастарымыз баспана алу үшін Нұр-Сұлтан, Алматы немесе Шымкентке жаппай көшу керек екен деп түсінбеуі керектігін баса айтты.

“Сондықтан да, мұндай пәтерді алу шартының бірі – соңғы 2 жылда сол қалада тұрақты тұру керек. Сонымен бірге, егер сіздер қолдасаңыздар, жастарға арналған жалға берілетін баспананы еліміздің басқа да өңірлерінде 2022 жылдан бастап салу мәселесін көтеруге болады” деді министр.

Айта кетейік, Жастар жылы аясында жастарға әлеуметтік қолдау көрсетуге бағытталған жобаның бірі – 29 жасқа дейінгі жастарға арзан бағада жалдамалы пәтер беру.

Т.РАУШАНҰЛЫ