АЗ ҚАМТЫЛҒАН ОТБАСЫНА 1 650 ГАЗ ЕСЕПТЕГІШ ҚҰРЫЛҒЫ ОРНАТЫЛДЫ

Ақпараттық-коммуникациялық орталығында Шымкент қалалық Төтенше жағдайлар департаменті бастығының міндетін уақытша атқарушысы, азаматтық қорғау полковнигі Аманбек Бейсембаевтың қатысуымен брифинг өтті.

Баспасөз мәжілісінде спикер қала аумағындағы өрт қауіпсіздік ахуалы мен өрттің алдын алу жұмыстары бойынша баяндады.

– Шымкент қаласында өрттің алдын алу мақсатында департамент қызметкерлері мемлекеттік бақылау жүргізілмейтін үй секторлары мен автокөлік иелеріне үгіт-насихат жұмыстарын жүргізіп жатыр. Сонымен қатар телеарналар мен радиоларда сұқбаттар беріліп, бейнероликтер көрсетілуде. Яғни мамандар арнайы көліктермен көшелерді, жеке үйлерді тікелей аралау арқылы түсіндірме жасап, жаднамалар тарқатуда. Нəтижесінде, осындай насихат жұмыстары барысында қызметкерлер екі отбасыны газдан уланудан аман алып қалды, – деді Аманбек Алтынбекұлы.

Спикердің айтуынша, тұрмыс жағдайы төмен топтағы отбасыларға жеке меншік ұйымдар есебінен 1 650 газ есептегіш құрылғы орнатылған. Ал он үш үйдің электр сымы жарамды күйге келтірілген. Сондай-ақ, алдағы уақытта Білім басқармасымен бірлесіп, қаланың әр мектебінде жас құтқарушылар тобын жасақтау жоспарланып отыр. Бұл шараның мақсаты балаларды қауіпсіздікке, оның ішінде өрт қауіпсіздігі талаптарын сақтауға баулу болмақ.

Айта кетейік, бүгінде насихат жұмыстарының ауқымын кеңейту үшін ерікті ұйымдар мен әкімшілік, ҚазТрансГаз қызметкерлері жұмылдырылған.