БӘЙДІБЕК: АҒЫБЕТ АУЫЛДЫҚ ОКРУГІНДЕ ЕСЕП БЕРУ КЕЗДЕСУІ ӨТТІ

Бүгін аудан әкімі Ерлан Нұрмахановтың есепті кездесуі Ағыбет ауылдық округінен басталды.

Алдымен аудан әкімі Ағыбет елді мекеніндегі «Айсана» балабақшасының ағымдағы жөндеу жұмыстарын, жаңадан құрылысы жүргізіліп жатқан «Майбұлақ» дәрігерлік амбулаториясын, Жұлдыз елді мекеніндегі ФАП-тың жөндеу жұмысын және салынып жатқан кіші футбол алаңдары мен балалар ойын алаңшасын аралап көрді. Жауапты мекеме басшыларына, ауыл әкіміне жөндеу, құрылыс жұмыстарының сапалы жүргізілуін қадағалауды және мердігер мекемелерге өндірістік кестеге сәйкес жұмыстарды сапалы аяқтауды тапсырды.

Сондай-ақ, Алғабас елді мекенінде «Оңтүстік Жарық Транзит» ЖШС-ның есебінен жүргізіліп жатқан электр бағаналары мен әуе желілерін ауыстыру жұмыстарымен танысты.

Одан соң Ағыбет ауылдық мәдениет үйінде ауылдық округтің тұрғындарына есеп берді. Есепті кездесуде аудан әкімі Ерлан Нұрмаханов ағымдағы жылы атқарылған, жүргізіліп жатқан және алдағы атқарылатын жұмыстарға кеңірек тоқталып өтті. Кездесуде ауылдық округке қарасты елді мекеннің тұрғындары аудан әкіміне өздерінің ұсыныстары мен пікірлерін жеткізді.

Тұрғындар тарапынан көпірді жөндеу, электр бағаналарын ауыстыру, ауыз су, ішкі көшелерді асфальттау және басқа да әлеуметтік мәселелер бойынша сұрақтар қойылды. Сұрақтарға сала бойынша аудан әкімінің орынбасары мен бөлім, мекеме басшылары мен ауыл әкімі тарапынан жауаптар берілді.

— Бекітілген кестеге сәйкес, бүгін арнайы өздеріңізбен кездесіп отырмын. Сіздердің ұсыныстарыңыз бен өтініштеріңіз бақылауға алынады. Хаттамаға енгізіліп, зерделеуді қажет ететін бірқатар мәселелерді анықтап, орындау жөнінде жауапты басшыларға тапсырма бердім. Көтерілген мәселелерді шешуге күш салып, әрбір өтініш бойынша тиісті жұмыстар жүргізілетін болады, – деді Ерлан Нұрмаханов.

Жиынға аудан әкімінің орынбасары, аудандық мәслихат депутаты, дербес бөлімдер мен мекеме басшылары, ауыл тұрғындары қатысты.

Бәйдібек ауданы әкімінің баспасөз қызметі