ЕЛБАСЫМЕН МАҚТАНАМЫН

Мен оқитын мектеп — жаңа,  әдемі, әсем ғимарат. Осындай әдемі мектепте білікті ұстаздарымнан жақсы білім алудамын. Менің Отаным  — Тәуелсіз Қазақстан. Қазақ Елінің азаттығын, тәуелсіздігін ата-бабаларымыз сан ғасырлар бойы арман етті. Білектің күшімен, найзаның ұшымен ұлан-байтақ жеріміздің алақандай бұрышына дейін сырттан қорғап, біздерге аманат етті.

1991 жылы Қазақстан Республикасы өз тәуелсіздігін жариялады. Бұл Елбасымыз Нұрсұлтан Әбішұлы Назарбаев атамыздың сарабдал саясаты мен терең білімінің, қайтпас қайсарлығының нәтижесі. Елбасының арқасында Қазақстан дамыған елдер қатарына кірді, қазақты әлем таныды. Бабалар арман еткен ғажайып бейбіт елді орнатқан Елбасымыз Нұрсұлтан Әбішұлы Назарбаев есімі Тұңғыш Президент ретінде тарихта әйгілі болып қала береді. Елбасымыздың әрбір қадамы жас ұрпақтың жарқын болашағы үшін жасалды. Біздің Елбасы дүниедегі ең керемет АДАМ. Ол туралы бізге сынып жетекшіміз, ата-әжелеріміз, әкеміз бен анамыз айтып отырады.

 Қазақстанда көптеген ұлт өкілдері тұрады. Бәріміз тату-тәтті өмір сүреміз. Елбасы барлық ұлт өкілдерін бірлікке шақырды. Қазақстанды тілі басқа, түрі басқа болса да, жүрегі бір жандардың жылы ұясына айналдырды. Тәуелсіздігіміздің тұғыры биіктеп, көк туымыз көк аспанда желбіреп, күннен-күнге қарыштап дамуда. Осы бақытқа жеткізген Елбасыммен мақтанамын.  Жүрегінде туған еліне, Отанына деген шексіз перзенттік махаббаты нық орнаған Елбасы – Нұрсұлтандай тұлғадан біз үлгі аламыз, біз де өз отанымыз үшін терең білім алып, айбынды қызмет ететін боламыз деп нық сеніммен айта аламын.

ЖАҚСЫБЕКОВ Абзал Батырханұлы,

О.Жандосов атындағы жалпы орта білім беретін мектебінің 4«Б» сынып оқушысы.

Жетекшісі: Шалкарова Перизат Кенесбаевна. Түркістан облысы, Қазығұрт ауданы