ҚАЗАҚСТАНДЫҚ ВАКЦИНАНЫҢ АРТЫҚШЫЛЫҒЫ НЕДЕ?

26 сәуірден бастап елімізде коронавируске қарсы қазақстандық вакцина салына бастады. Әзірге ел өңірлеріне екпенің 50 мың дозасы жеткізілді. Отандық вакцинаның артықшылығы неде?

Елімізде коронавируске қарсы вакциналау ақпанның бірінде басталып кетті. Бүгінге дейін азаматтарыға ресейлік «Спутник Ви» екпесі салынған болатын. Ал 26 сәуірден бастап, отандық QazVac вакцинасы егіле бастады. Ол Дүниежүзілік денсаулық сақтау ұйымының реестрінде тіркелген. Ғалымдар екпені жасау үшін соңғы 60 жыл ішінде зерттелген әрі қауіпсіз компоненттерді қолданды. Құрамында инактивті вирус бар. Ал ресейлік «Спутник Ви» екпесіндегі вирус белсенді.

— «Спутниктің» бірінші компоненті аденовирустың 26-серотипі, екінші компоненті 5-серотипіменен ерекшеленеді. 2 компонентті бірінен соң екіншісін алуымыз қажет. Бірінші компонентті екі рет салуға болмайды. Арасында 21 күн болу қажет. Егер белгілі бір себептермен 2 компоненті салынбаса, онда оны 60 күн аралығында салуға болады, — дейді ҚР ДСМ Қоғамдық денсаулық сақтау ұлттық орталығы басқарма төрағасының орынбасары Айнагүл Қуатбаева.

Отандық вакцина жасушалық иммунитетті қауіпсіз түрде қоздырады. Оны арнайы тоңазытқышта сақтаудың қажеті жоқ. Екпені жеткізу үшін күрделі қондырғылар қолданылмайды. Температурасы 2-8 градустық техниканың болғаны жеткілікті. Клиникалық зерттеулердің нәтижесінде «QAZVAC» вакцинасының бірінші компонентін алғандарда вирусты бейтараптандыратын антиденелердің пайда болатыны анықталды. Екінші рет екпе салынған соң оның деңгейі тұрақты түрде өсетіні дәлелденді.

— Инактивтелген «Казвак» вакцинасының да ерекшелігі бар. Оның ерекшелігі елімізде былтыр ең бірінші ауырған науқастардан бөлінген вирус ғылыми институттың базасында арнайы биологиялық қауіпсіздікті сақтай отыра өңделген. Бұрынғы биологиялық қасиеттерінен айырылған. Бұл вакцинаның құрамындағы инактивтелген вирустың ешқандай ауру шақыратын қасиеттері жоқ, — дейді Айнагүл Қуатбаева.

Қорытындылай келгенде екі вакцина да бұлшық етке салынатынын атап айтуға болды. Қос екпе ағзаға қауіпсіз әрі антидененің пайда болуына әсер етеді. Алайда оларды жасағанда 2 түрлі вирус қолданылды.

Айта кетейік, отандық вакцинаның алғашқы 50 мың дозасы еліміздің барлық өңірлеріне жеткізілді. Мамыр айында тағы 50 мың доза шығарылады деп жоспарланып отыр. Кейін өндіріс қуаттылығын 500-600 дозаға дейін арттыру көзделген.