ШЫМКЕНТТЕ ЫЛҒАЛДЫ МАЙЛЫҚТАР ШЫҒАРЫЛАДЫ

Қазақстан әлемнің ең дамыған 30 елінің қатарына кіруді мақсат еткен мемлекет. Ал дамудың маңызды көрсеткіштерінің бірі – шағын және орта бизнес үлесін 50%-ға жеткізу. Осыған орай, өз ісімді ашамын немесе кәсібімді өркендетемін, кеңейтемін дегендерге барынша тиімді ұсыныстар мен жағдайлар қарастырылған. Тек «егіннің ебін, сауданың тегін үйреніп алсаңыз» жеткілікті.  

«Билал» өндірістік кооперативі 1997 жылы құрылған. Бүгінде тарихы терең, серіктестерімен тығыз қарым-қатынас орнатқан компания. Алғашында гигиеналық құралдардың түрлерін шығара бастаған.
Ал қазір кәсіпорын жұмсақ лосьоны бар әмбебап ылғалды майлықтар шығарумен айналысады. Оны «Luna Fresh» сауда таңбасымен сатылымға шығарады.
«Luna Fresh» ылғалды майлықтары теріні тазартады және сергітеді. Бұл қолдың, бет пен дененің терісіне күнделікті күтім жасау үшін өте қолайлы. Майлықтар антибактериалды лосьонмен сіңдірілген, жұмсақ, сырғымайтын материалдан жасалған. Компания бір реттік майлықтардың 15, 25, 72 және 120 данадан тұратын түрлі пакеттерін дайындады. Дайын өнімдер дәріханаларда, емханаларда және қарапайым дүкендерде сатылады.
— Қазіргі уақытта компанияда 30-дан аса жұмысшы бар. Олардың әрқайсысы біздің компанияның дамуы үшін барын салады. Өнімдердің сапасын үнемі бақылап отырамыз және клиенттерімізге жоғары сапаға 100% кепілдік береміз, — дейді компания басшысы Гаджи Гаджиев.
Мекеме «Бизнестің жол картасы — 2025» мемлекеттік бағдарламасы арқылы төмен пайызбен айналым қаражатын толықтыруға және жабдықты сатып алуға несие алады. Бүгінгі күні компания дизайны басқа қосымша өнімдерді шығаруды жоспарлап отыр.
Басты мақсаттарының бірі Орталық Азиядағы өнімдер нарығын жаулап алу және Қазақстанның ең жақсы және бәсекеге қабілетті кәсіпорындарының бірі болу дейді.

Алтын АСҚАР