ТӘУЕЛСІЗ ЕЛДІ ӘЛЕМГЕ ТАНЫТҚАН ӨНЕР ИЕЛЕРІ

Тәуелсіз Қазақстан тарихында өнерімен өз елін ғана емес, әлем елдерін де мойындатқан жұлдыздар аз емес. Атақты режиссер Тимур Бекмамбетовтың Атырау облысының тумасы екенін көпшілік біле бермейді. Талантты режиссер көпшілікке кеңінен танылған «Громовы»», «Ёлки» сынды атақты кинотуындылардың авторы.

Қазақстанның атын дүниежүзіне асқақтатып жүрген топтардың бірі– атақты «Ұлытау» тобы болып табылады. 2001 жылы әйгілі топ АҚШ-тың Голливудында өткен дүниежүзілік байқауда Гран-при алып, алты алаштың абыройын асқақтатқан еді. Бүгінде танымал топ көпшілікті әлі де әсерлі концерттерімен қуантып жүр.

Айрықша дауысымен елді өзіне қаратқан қазақ әншілерінің бірі – Роза Рымбаева. Қазақстанның атын бұрынғы Кеңес Одағы мен қазіргі ТМД елдеріне әйгілеген Роза Қуанышқызы күні бүгінге елдің сүйікті әншілерінің қатарынан табылып отыр. Әншінің екі ұлы Әли мен Мәди Оқаповтар да өнерге бет бұрған. Олардың бірі ән орындаса, енді бірі фортепианода ойнайды.

Сол сияқты белгілі актерлер Әсел Сағатова мен Санжар Мәди, Аружан Жазылбековалар да ресейлік көрермендерге етене таныс өнер иелерінің қатарында болып табылады.

Ерекше даусымен күллі әлемді өзіне қаратқан Димаш Құдайбергеннің орны қазақ эстрадасы тарихында тіптен бөлек. Әнші бүгінде Ресейден басқа АҚШ, Қытай сияқты әлемнің алпауыт елдері мен бірқатар Еуропа елдеріне кеңінен танымал.

Ел абыройын асқақтатқан тағы бір жас әнші Данелия Төлешова. «Голос. Діті. Украина» байқауы арқылы танылған өнерпаз күні кеше ғана «The World’s Best» байқауына қатысып, ел мерейін тағы бір мәрте асқақтатқан еді.

Аталмыш жобаның ресейлік нұсқасында ақтық финалға дейін жеткен Максим Ержан да Қазақстан атын Ресейдегі ән байқауында шығарды.