ТӘУЕЛСІЗДІК ЖЕМІСІ: ЖАРҚЫН БОЛАШАҚҚА ЖОЛ САЛҒАН НАЗАРБАЕВ УНИВЕРСИТЕТІ

Елдің болашағы жарқын болу үшін жастары білімді, интеллектісі жоғары болмағы қажет. Ұрпақ неғұрлым білімді, сауатты болған сайын мемлекеттің болашағы жарқын бола түспек. Қазақстан Тәуелсіздік алғаннан кейін Елбасының бастамасымен «Болашақ» бағдарламасы дүниеге келді. Дегенмен ол барлық қазақ баласының шетелге барып білім алуына қолжетімсіз. Жыл сайынғы шектеулі гранты екінің біріне бұйыра бермейтін бақ. Дегенмен, алысты болжай білетін Елбасы жастар шетелге емес, шетелдік мықты мамандар Қазақстанға келіп білім беретіндей жағдай қалыптастырды. Көп ой мен ізденістің нәтижесінде Назарбаев университеті құрылды.

Еліміздің ең ерекше оқу орны — Назарбаев университеті Қазақстан Республикасының Президенті Нұрсұлтан Назарбаевтың бастамасы бойынша құрылған жаңа университет. Университет миссиясы — Қазақстанда білім мен ғылыми-зерттеу қызметінің дамуына мүмкіндік беру, сонымен қатар Астананың Еуразия орталығында зерттеу және білім беру орталығын қалыптастыру.

Университет өзіндік білім стандарттары бойынша жұмыс істейді. Әлемнің түкпір-түкпірінен жиналған атақты профессорлар дәріс береді.