ЕГЕМЕН ЕЛДІҢ ЕЛОРДАСЫ

Тәуелсіз жұрттың төлқұжатына айналған бас қала. Егемен елдің еңсесін көтеріп, етек-жеңін жиғанын төрткүл дүниеге танытқан Орда. 

1994 жылдың 6 шілдесінде Тұңғыш Прези­дентіміз Нұрсұлтан Назарбаев Жоғарғы Кеңес сес­сия­сының жалпы отырысында елорданы Алматыдан рес­пуб­ликаның орталық өңірі Ақмолаға көшіру жөніндегі тарихи идеясын жариялады. «Менің тапсырмам бойынша мемлекеттің жаңа астанасын орналастыруға оңтайлы жерді анықтау мақсатымен рес­пуб­ликаның бүкіл аумағы ег­жей-тегжейлі зерттелді. 32 тұр­ғыдан жүргізілген талдау барл­ық нұсқалардың ішінен ең дұрысы Ақмола қаласы екендігін көрсетті…», деді Елбасы сол бір тағдыршешті тарихи сәтте. Саяси ғылым докторы, профессор Сайын Борбасов бұл кезеңді «Президент Қазақ­стан Республикасының Жоғарғы Кеңесінің бірінші сессиясындағы сөзінде Қазақстанның астанасын Алматы қаласынан Ақмола қаласына көшіру туралы ұсынысын айтты. Бұл ұсыныс Парламентте ғана емес, бүкіл Қазақстан қоғамында қызу талқыға түсті. Тәуелсіздіктің алтын бесігі болған Алматы қаласы елдің шетінде орналасқан. Қаланы жаңа тұрпаттағы астанаға айналдыру үшін жері мен құрылыстық мүмкіндіктері шектеулі. Алматыда жаңа құрылыс салу Ақмолаға қарағанда 2,5-3 есе қымбатқа түсті. Қалада бос жерлер тым аз болды. Кеңес Одағы тұсында негізгі шешімді Мәскеу шығарып отырғандықтан, Алматы республиканың астанасы рөлін атқара алды. Ал, тәуелсіз елдің Астанасы оның орталығында, барлық аймақтармен жақсы байланысы бар қалада орналасқаны тиімді еді. Ең бастысы елорда­ның Орталық Қазақстанда болуы билік­тің солтүстік-шығыс аймақтарға саяси ықпалы­ның артуына зор көмегін тигізді» деп еске алады.

Тоқырау жылдарынан қалған тоң жібіген соң, 1997 жылы 20 қазанда Ел­басының «Ақмола қаласын Қазақ­стан Республи­касының астана­сы деп жариялау туралы» Жарлығы жарияланды. Тау-тасы жоқ жазық далада талайды тамсандырар ғажап қала тұрғызылды. Астананың жаңаруымен елдің жаңғыруы орын алды. Шешімнің дұрыстығын тарих өзі дәлелдеді. Мұны Елбасының өзі де: «Біздің Астана сәулет өнерінің жауһар туындыларына, үздік үлгідегі ескерткіштеріне, алуан гүлдермен өрнектелген бау-бақшаға оранған, шығыс пен батыстың ең озық, рухани құндылықтарын талғаммен бойына жинаған жоғары мәдениетті қалаға айналды», – деп сүйсіне еске алады.

Тәуелсіздіктің 30 жылдығы. «30 жылда қазақ елі қалай өзгерді?» десеңіз, бас қала Нұр-Сұлтанға сапарлап қайтыңыз. Сәулеті мен салтанаты келіскен келбетті шаһар бей-жай қалдырмасы анық.

Алтын АСҚАР