ҰЛТТЫ ҰЙЫСТЫРҒАН ИДЕЯ

Алдына межелі мақсаттар қоя білетін, ертеңіне сеніммен қарайтын, ділі мен дініне берік, жастары алғыр, рухы биік, жақсылыққа жаны құштар халық қана тарихта «Мәңгілік Ел» болып қалатыны анық. Бүгінгі қазақ елінің басты мақ­саты – әлеуеті жоғары, экономи­ка­сы мығым,бірлігі жарасқан, бә­секелестікке қабілетті, ең мы­қ­­­ты 30 елдің қатарынан көрі­ну.

Осы ретте, Қазақстан Республи­касының Пре­зиденті Н.Ә.Назарбаевтың «Мәң­гілік Ел» бастамасы ұлы мақ­сат­­тарға жете­лейтін игі қадам бо­лары анық. Бостандық, еркіндік, тәуел­сіздік – бабалар арманы. Ал тәу­елсіздікке қол жеткізген соң оны сақтап қалу, одан да қиын. Тәуелсіздікті сақтап қалу үшін ел ішінде алауыздыққа жол бермеу қажет. Ал, ол үшін халыққа біртұтас идея, алға жетелейтін бағыт-бағдар, мақсат-мұрат керек. Тәуелсіздік алып, ел болып есімізді жинаған күннен бас­тап, қазақтың қамын жейтін перзенті – Нұрсұлтан Әбішұлы елдің жоғын жоқтап, асылын ар­дақтап келеді. Бүкіл әлем қызыға қарайтын еліміздегі тыныштық пен тұрақтылық, экономикалық даму, ұлтаралық татулық – Елба­сымыздың сындарлы саясат­керлігінің жемісі.

Қазaқстан өз егемендігін ал­ған алғашқы күннен бастап-ақ Елбасы Нұрсұлтан Нaзарбaев: «Алдымен – экономика, содан соң сaясат» деп көрсеткен болa­тын. Бұл бaғыттың ең дұрыс, әрі тиімді таңдау екендігін өмірдің өзі дәлелдеді. Соның нәтижесінде Қaзaқстан Республикасы – әлемдік деңгейдегі қуaтты мемлекеттермен иық теңестіріп, көптеген мемлекеттердің алдына шығып, көш бaстап отыр. Мақсатсыз елдің тарихта қа­луының неғайбыл екенін тереңнен түсінетін, ұлттың жасампаздығына ұлттық идея қажет екенін бүкіл болмысымен сезінетін Елбасы Нұрсұлтан Әбішұлы Назарбаев Қазақстан халқына кезекті Жол­дауында «Мәңгілік Ел – ата-ба­бамыздың сан мың жылдан бергі асыл арманы екенін барлығымыз білеміз. Ол арман әлем елдерімен терезесі тең қа­тынас құратын, әлем картасынан ойып тұрып орын алатын тәуелсіз мемлекет атану еді. Ол арман тұрмысы бақуат­ты, түтіні түзу шыққан, ұр­пағы ертеңіне сеніммен қарайтын бақытты ел болу еді. Біз үшін бола­шағымызға бағдар етіп ұлтты ұйыстыра ұлы мақсаттарға жетелейтін идея бар. Ол – Мәңгілік Ел идеясы. Тәуелсіздігімізбен бірге халқымыз мәңгілік мұраттарына қол жеткізді. Біз еліміздің жү­регі, тәуелсіздігіміздің тірегі мәң­гілік елордамызды тұрғыздық. Қазақтың мәңгілік ғұмыры ұр­пақтың мәңгілік болашағын баянды етуге арналады. Ендігі ұрпақ – мәңгілік қазақтың перзенті. Ендеше, қазақ елінің ұлттық идеясы – «Мәңгілік Ел», – деген болатын.

Осы Жолдаудағы елді елең еткізген басты жаңалық – «Мәңгілік Ел» идеясының жария­лануы еді. 10 нақты идеяны айқындаған Елбасының басты мақсаты – ата-бабамыздың арманы болған Ұлы Дала халқын «Мәңгілік Ел» етіп, тарихта қалдыру. Бүгінде халқымыз «Мәңгілік Ел» идеясы – Түркі қағандарының, Қазақ хандарының қалауы, Абай­дың арманы, Алаш қайрат­кер­лерінің ғасырлар бойы арман­даған, елді ымыраға ұйыстыратын, ірі мақсатқа жұдырықтай жұмыл­дыратын, ұлттық идеология екендігін ұғынды. Сондықтан да, «Мәңгілік Ел» ұлттық идеясын әрбір азамат жалаудай желбіретіп, ұстанымдарын, бағыт-бағдарын көзінің қарашығындай сақтап, жоғалтпай, келер ұрпаққа аманат ете білуі қажет.

Алтын АСҚАР